Shashka qoidalari
Shashkam ilovasida o'yinlar shu qoidalar bo'yicha o'tadi. Ilova noto'g'ri yurishga yo'l qo'ymaydi va urish majburiy bo'lsa o'zi ko'rsatadi — shuning uchun hammasini yodlash shart emas.
Taxta va donalar
O'yin 8×8 taxtada, faqat qora kataklarda o'ynaladi. Har bir o'yinchida 12 tadan dona — ular taxtaning o'z tomonidagi uchta qatorga teriladi.
Birinchi bo'lib oqlar yuradi, keyin navbatma-navbat.
Oddiy yurish
Oddiy dona diagonal bo'yicha faqat oldinga, qo'shni bo'sh katakka yuradi.
Orqaga yurish mumkin emas — lekin urishda orqaga ham uriladi.
Urish — majburiy
Raqib donasi yonma-yon tursa va uning orqasidagi katak bo'sh bo'lsa — uni sakrab o'tib olasiz. Oddiy dona oldinga ham, orqaga ham uradi.
Urish imkoni bo'lsa, urish SHART. Ilova bunday holatda faqat urish yurishlarini beradi.
Ketma-ket urish
Bitta yurishda bir nechta donani ketma-ket olish mumkin — va olish mumkin bo'lgan joyda to'xtab qolish mumkin emas, oxirigacha urasiz.
Bir nechta yo'l bo'lsa, qaysi biridan urishni o'zingiz tanlaysiz — eng ko'p dona olinadigani shart emas. Olingan donalar yurish tugagandan keyin taxtadan olinadi.
Damka
Taxtaning narigi chetiga — raqibning oxirgi qatoriga yetgan dona damkaga aylanadi.
Damka diagonal bo'yicha istalgan masofaga yuradi va uzoqdan uradi; urgandan keyin olingan dona ortidagi istalgan bo'sh katakka tushishi mumkin. Agar dona urish paytida oxirgi qatorga yetsa, shu zahoti damka bo'ladi va urishni damka sifatida davom ettiradi.
G'alaba, durang va vaqt
Har bir o'yin vaqt nazorati bilan o'tadi: 1+1, 3+2 yoki 5+3. Birinchi raqam — daqiqa, ikkinchisi — har yurishdan keyin soatingizga qo'shiladigan soniya.
Tez-tez beriladigan savollar
- Shashkani onlayn qanday o'ynash mumkin?
- shashkam.uz saytini yoki Telegram'da @ShashkamBot'ni oching va Telegram orqali kiring. «O'ynash» tugmasi tasodifiy raqib topadi; do'stingizni havola orqali chaqirish yoki kompyuter bilan o'ynash ham mumkin. Hammasi bepul.
- Shashkam qaysi qoidalar bo'yicha o'ynaydi?
- Rus shashkasi qoidalari bo'yicha: 8×8 taxta, har tomonda 12 tadan dona, oddiy dona orqaga ham uradi, damka diagonal bo'yicha istalgan masofaga yuradi.
- Urish majburiymi?
- Ha. Raqib donasini urish imkoni bo'lsa, urish shart va ketma-ket urishni oxirigacha davom ettirasiz. Bir nechta yo'l bo'lsa, qaysi birini tanlash o'zingizga bog'liq — eng ko'p dona olinadigani shart emas.
- Damka qanday yuradi?
- Raqibning oxirgi qatoriga yetgan dona damkaga aylanadi. Damka diagonal bo'yicha istalgan masofaga yuradi, uzoqdan uradi va olingan dona ortidagi istalgan bo'sh katakka tushadi.
- «3+2» nima degani?
- Birinchi raqam — har bir o'yinchiga beriladigan daqiqalar, ikkinchisi — har yurishdan keyin soatga qo'shiladigan soniyalar. Shashkam'da Bullet 1+1, Blitz 3+2 va Tezkor 5+3 bor.
- Qachon durang bo'ladi?
- Ikkala o'yinchi kelishsa, bir xil pozitsiya 3 marta takrorlansa yoki faqat damkalar qolib, 15 yurish davomida urish bo'lmasa.